စစ်အာဏာရှင်များ ခင်ဗျား..ကိုယ့်မြေးအရွယ်လေးပါ... ကိုယ်ချင်းစာကြည့်ပါ

စစ်အာဏာရှင်များမှ အရွယ်ရောက်သူတိုင်း စစ်မှု မထမ်းမနေရ ဥပဒေကို တရားဝင် ပြဋ္ဌာန်းလိုက်တယ်လို့ ဂျပန်သတင်းဌာန NHK က ဖော်ပြပါရှိပါတယ်..။ ကဲ အရွယ်ရောက်သူတိုင်း စစ်မှုမထမ်းမနေရ ဆိုတာထက် တိုင်းပြည်မှာ လက်ရှိခံစားနေရတဲ့ ပြည်သူတွေရဲ့ ဒုက္ခဆင်းရဲ ကြပ်တည်းမှု အဖုံဖုံကို ဖြေရှင်းပြီးမှ ဒီဥပဒေကို စဉ်းစားပါဦး အာဏာရှင်ကြီးများခင်ဗျား..။

ဒီပုံမှာကတော့ မန္တလေးမြို့ ဘုရားပွဲတစ်ခုရဲ့ မိုးရေထဲ ရွှံ့ဗွက်ထဲမှာ အဝတ်ဗလာနဲ့ အစာရေစာ ငတ်ပြတ်ပြီး မိန်းမောနေတဲ့ ကလေးငယ်နဲ့ မိခင်တို့ရဲ့ ကြေကွဲဖွယ် မြင်ကွင်းပါ..။ မြန်မာပြည်သူ ပြည်သားတွေပါ..။ ကိုယ့်မြေးအရွယ်လေးပါ... ကိုယ်ချင်းစာကြည့်ပါ အာဏာရှင်ကြီးခင်ဗျား..။ ဒီလို မြင်ကွင်းတွေဟာ မြန်မာပြည်ရဲ့ နေရာအနှံအပြားမှာ လတ်တလော မြင်တွေ့နေရတဲ့ မြင်ကွင်းတွေပါပဲ။ နိုင်ငံရဲ့ ဘဏ္ဍာငွေတွေကို စစ်တပ်ရဲ့ ခေါင်းစဉ်အမျိုးမျိုးအောက်နဲ့ အာဏာရှင်ဗိုလ်ချုပ်ကြီးများ ခွဲဝေယူနေကြတာ ရပ်တန်းက ရပ်သင့်နေပါပြီ။ မိမိအသက်အရွယ်ရဲ့ နောက်ဆုံးအချိန်မှာ ကောင်းတာလေးတော့ ရှိဘူးတယ်ဖြစ်အောင် လုပ်ပြသွားပါဦး။

တေဇသားများ

တေဇသားများ

မိမိသားမြေးတွေကို ချစ်တတ်သလို တိုင်းသူပြည်သားတွေ အပေါ်မှာလည်း ကိုယ်ချင်းစာ စိတ်လေး ထားပေးပါဦး။ မနာလို မရှုစိမ့်နဲ့ ရေးသားနေခြင်းမဟုတ်ပဲ ပြည်သူပြည်သားတွေ စားနိုင်သောက်နိုင် နေနိုင်လောက်တဲ့ အခြေအနေလေး တစ်ခုကို ဖန်တီးပေးနိုင်လောက်တဲ့ အခြေအနေတောင် မတတ်နိုင်သေးဘဲ စစ်မှုမထမ်းမနေရ ဥပဒေကို ပြဋ္ဌာန်းပါဦးမယ်တဲ့။ ဗိုလ်ချုပ်ကြီးတို့ရဲ့ သားသမီး မြေးမြစ်တွေကော စစ်မှုထမ်းနိုင် မထမ်းနိုင် အရင်မေးမြန်း စုံစမ်းကြည့်ပါဦး။ မည်သူမဆို မဝင်မနေရ စစ်မှုထမ်းရမယ် ဆိုတဲ့ဖြစ်ပေါ်လာမဲ့ ပြဋ္ဌာန်းမှုရဲ့ နောက်ကွယ်မှာ လူအစားထိုးမှုတွေ၊ ငွေကြေးရယူမှူတွေနဲ့ ဗိုလ်ချုပ်ကြီးတွေ အတွက် ဂွင်အသစ်တွေများ ဖန်တီးပေးနေတာလားဗျာ။ ကျွန်တော်တို့လို စစ်ရေးအမြင်မရှိသူ တစ်ယောက်အနေနဲ့ ပြောချင်တာကတော့ အထက်ကပုံပါ ကိုယ့်ပြည်သူ၊ ပြည်သားတွေရဲ့ ဆင်းရဲကြပ်တည်းမှုတွေ အတွက် သောကမအေးဖြစ်ရပါတယ်။ အဲ့ဒီအတွက်ကြောင့် အာဏာရှင် ဗိုလ်ချုပ်ကြီးတွေ အရွယ်ရောက်သူတိုင်း စစ်မှုမထမ်းမနေရ ဥပဒေမပြဋ္ဌာန်းခင် ဗိုလ်ချုပ်တွေ ပြောင်ပြောင်ရောင်ရောင်နဲ့ ပြည်သူတွေ ဝမ်းခေါင်ခေါင် ဖြစ်နေရတဲ့ ကျွန်တော့်တုိ့ ပြည်သူပြည်သားတွေရဲ့ ဝမ်းရေးကိစ္စကို အရင် ဖြေရှင်းပေးကြပါဦးလို့ တိုက်တွန်းလိုက်ရပါတယ်.. အာဏာရှင်ကြီးများ ခင်ဗျား...။


ဒီမိုဝေယံ
Monday, January 10, 2011